Get Adobe Flash player

ياضايق البال

 

بدري عليك اللوم ياضايق البال قلبك تحمل ضيقته وانكساره

مايفرح بحزنك سوى ناس عذال  والا الرفيق يذوق مثلك مراره

هيا كذا الدنيا سهالات واهوال   تاره تبسم لك وتبكيك تاره

فيها بشر عانت لاجل تبني اجيال  واشخاص عاشت لاجل تبني عماره

ريّح اركابك جامل الناس واحتال  على شعورك لاتبين دماره

وسرك لو ان تكشفه صار جوال  الناس تبغى الاكشنه والاثاره

ماكل حزنن يسكن القلب ينقال  بكره يدور اسمك على كل حاره

ولانتب اول شخص قالو بالامثال  النار دايم مبتداها شراره

اضحك ابوجه اعداك  في  كل الاحوال  لاجوك مقصودين سو استداره

خلك مع المحتال غامض ومحتال  ومع طرقته دامه امجاريك جاره

لو قال كيف الحال جاوبه بالحال  وضح له انك مبتهج بالزياره

ولاراح مايمنع لو تجر موال  جرة غريبن وده بشوف داره

وش تنتظر من ناس ماعندها اشغال  ناسن تحسب ان المغثه شطاره

وبعض المصايب تفرز اشكال واشكال  تظهر بها الرديان واهل النعاره

ولو تشخل اللي يعرفونك بمشخال  تقول انا أطيب بشر عن جداره

تشوف فزعة شخص ماهو على البال  واللي تهقوابه يسوق اعتذاره

واللي توقف له مواقيف الابطال  يقعد ويشمت فيك خلف الستاره

اياك والحقران في بعض الازوال  وترى الشكل ماهو دليل الطهاره

وماكل رجالن لبس بشت رجال  كم واحدن ماهو بيدينه قراره

واللي يجيك وللثقيلات شيال  هو اللي يفخر فيه بشت الاماره

عليك باللي يلحق القول بافعال  والا الردي خله وجنب مساره

انشهد انه ماكذب واحدن قال  من لايعدك ربح .. عده خساره

الشاعر: مبارك الحجيلان

يا سعــود
ياسعود انا بعطي للحق توضيح
بعطي مما شفت راي ونصيحه
راع الخطا يحتاج لفه وتصحيح
لان الخطا ياسعود فيه الفضيحه
اترك وجيه الخايبين المقابيح
اهل الدعايا والكفوف الشحيحه
علي بلي للمراجل مشافيح
كانك تبى العليا وكسب المديحه
صون الصداقه وغتنم هبت الريح
عوايدٍ لهل الوجيه الفليحه
صلاة رب والذكر والتسابيح
هذي دروب الصالحين الصحيحه
وترك قليل الدين ماله مرابيح
ماله صديقه ولا دروبٍ صريحه
جنّب دروب الخايبين السلاتيح
اهل النفوس الممحلات الجريحه
مال الفليح الا الوجيه المفاليح
ومال القبيح الا الوجيه القبيحه
وختامها ياسعود للحق توضيح
أعطي مما شفت راي ونصيحه
وصلو عدد ماتشرق الشمس وتطيح
على محمد يالوجيه الفليحه

الشاعر: فهد بن سكران

يبقى القصيد العذب والحر الاصيل
عمله  فريده  لو زمانك... ضامها
مثل الكرم والجود  بعذوق  النخيل
ظلٍ  ظليل  وخيرها... قدامها

نايف الدعيات

لاتحسب إني عديم احساس بالمرّه
قاسي معك صح وانت اسباب قسواتي
هذي  فعايلّـك  لا تغضب  وتتشره
احسن لي اخْسرْك من قبل آخسر ذاتي

احمد الدواي

يمر حزن الغرام ويلتفت صوبي
ويقول عادك على خبري واقول الا
يادوب جرحي تلاشى منك يادوبي
وفي غير طاريك لأرحب ولا هلا

سعود ربيع

لاتحاول تمسك الوقت وترد السنين
  وقتك الي فات ماراح  تقدر تِرْجعة
مير لك عندي نصيحة تفطن يافطين
  توبةٍ  لله  دام  الهوى  تسترجعة

بدر الحبيني

محتــاجـه أوقّف عن التفكير
وعن لـ.. ما يتعبني أحلم به!
من عمري اللي راح فـ التقصير
وعن عمري اللي جاي ماأعلم به!

‏‫الشاعره: ترنيمه‬‏ ‏العتيبي

 

فرحة العمر ‏مهجتي واتلا على الجوف  رعدي

مثل ريح الامس في طاري غدي

طهر غيمٍ اعتلى عشبٍ ندي

وانهمى من طاري الوجد بردي

‏‏‫الشاعره: عنود الصيد